Ўзбекистон Республикасининг болалар соғломлаштириш оромгоҳлари

 "YOSH ALANGACHI" оромгоҳи 7-14 ёшли болалар учун ёзги соғломлаштириш оромгоҳи бўлиб, Китоб туман марказидан  атиги 20 км узоқликда, Китоб-Самарқанд  йўналишидаги Тахти Қорача довонининг бошланиш қисмида автомобиль йўлида тоғлар этагидаги экологик тоза ҳудудда жойлашган. Манзарали дарахтлар билан  тўлдирилган 5 гектар майдон ажойиб дам олиш учун қулай маскандир.

         Турар жойлар қулайликларга эга 6-20 кишилик шинам хоналардан иборат. Оромгоҳ ошхонасида кунига 5 маҳал мазали ва фойдали таомлар таклиф этилади. Ҳудудда хавфсизликни таъминлаш учун видео-кузатув тизимлари ўрнатилган ва Ички ишлар, Миллий гвардия ва Фавқулодда вазиятлар вазирлиги ходимлари туну-кун болалар хавфсизлиги учун навбатчилик қилишади.

          Оромгоҳда мавсум давомида турли маданий-маърифий, кўнгилочар тадбирлар -  оромгоҳ маликаси, жажжи рақс маликаси, тақлид устаси, жонли ижро, шеърият кечалари, рақс қироли, билимдонлар беллашуви, қувноқлар ва зукколар беллашувлари, шоирлар хотирасига бағишланган кечалар, сув байрами,  либослар кўргазмаси, кулги куни, спорт тадбирлари, рассомчилик, бадиий безак, моҳир қўллар ва шу каби бир қатор тадбирлар ўтказилади. 

            Бу тадбирлар  болажонларнинг ўзига бўлган  ишончни  юксалишига, она Ватанимизга бўлган меҳрини ортишига, дунёқараши ҳамда билим савиялари ўсишига катта туртки бўлади. Барча тарбиячи ва етакчилар оромгоҳда жамоа ишини ва педагогик гуруҳ ишини биргаликда режалаштириш, гуруҳлар, тўгараклар, кутубхона, спорт мусобақалари ишларини назорат қилиш ва болаларни ўз-ўзини бошқариш органлари фаолиятини оширишга кўмаклашиб, илғор иш тажрибаларни ўрганади, умумлаштиради ва  оммалаштиради.

            Болаларнинг ҳам жисмоний, ҳам руҳий жиҳатдан ҳордиқ чиқаришлари таъминланиб, турли мавзуларда қизиқарли беллашувлар, спортнинг болаларга хос турлари бўйича мусобақалар орқали болалар спорти оммалаштирилади.

            Ҳар бир сменада жамоалар ўртасида ўтказиладиган “Ёш қутқарувчи”, “Ёш ёнғин ўчирувчи”, футбол, волейбол, баскетбол, стол тенниси, шахмат, шашка, қувноқ стартлар каби мусобақалар, болалар оромгоҳида ўтказилган маданий-маърифий ва спорт тадбирларида таниқли маданият, фан, адабиёт ва санъат ходимлари ҳамда спортчиларнинг иштироклари таъминланади. “Қўғирчоқ театри”, кино ва цирк томошалари тақдим этилади.

           Сизни "YOSH ALANGACHI" оромгоҳида ёзги саргузаштлар масканида кутамиз! Сменалар 4 июндан 6 августгача бўлган 12 кунлик дастур асосида ташкиллаштирилади. Биз азиз болажонларнинг оромгоҳимизда мазза қилиб дам олишлари учун тайёрмиз!